GENSAN- Gibutyag ni Atty. Rey Cartojano nga ang sayong pagdeklara ni Vice President Sara Duterte sa iyang pagdagan sa pagkapresidente usa ka “calculated move,” ilabina nga nag-atubang siya og impeachment complaint.
Matod niya, kini mahimong usa ka counter measure aron masukod ang suporta sa mga kongresista ug magpahimangno sa mga nagpirma sa reklamo batok kaniya.
Ang deklarasyon ni Duterte nagpahimutang sa iyang posisyon isip frontrunner, nagtanggal sa espekulasyon, ug nagtugot sa pagklaro kung kinsa sa mga politiko ang magpabiling kaalyado o magkampi kaniya sa umaabot nga eleksyon.
Gidugang usab ni Atty. Cartojano nga ang maong lakang usa ka estratehiya aron masayran kung kinsa ang tinuod nga mga kaalyado ug kinsa ang posibleng mobiya sa panahon sa krisis.
Pinaagi sa sayong pag-anunsyo, makita sa publiko ug sa mga politiko ang kalig-on sa posisyon ni Duterte, samtang ang uban mahimong maghunahuna og balik sa ilang desisyon sa pagsuporta.
Matod pa niya, kini usa usab ka pamaagi aron kontrolon ang ‘political narrative’ ug maminusan ang tensyon sa politika samtang nagpadayon ang proseso sa impeachment, nga usa ka ‘numbers game’ sa Kongreso.
Sa kinatibuk-an, giingon ni Cartojano nga ang desisyon ni Duterte dili lamang simpleng pag-anunsyo sa kandidatura kundi usa ka mahinungdanong lakang sa pagplano sa iyang kampanya ug sa pagprotektar sa iyang kaugalingong kaugmaon sa pulitika.
