GENSAN- Gibutyag ni Atty. Rogelio Garcia nga dugay na niyang gilauman ang pag-anunsyo ni Vice President Sara Duterte sa iyang pagdagan sa pagkapresidente, ug matod pa niya, dili na kini ikatingala sa nagasubay sa kalihukan sa nasudnong politika.
Sumala kang Garcia, wala na’y rason pa nga hulaton ang tuig 2028 aron ideklara ang kandidatura ni VP Sara, ilabina nga mas sayo pa lang makita na kung kinsa ang mga andam moatbang kaniya.
Matod niya, pinaagi sa sayong pag-anunsyo, masayran dayon kung kinsa sa mga kaalyado sa administrasyon ang motindog isip oposisyon batok sa bise presidente.
Apan alang kang Garcia, dili ikalimod nga kusog nga “manok” sa politika ang bise presidente, ug dako kini’g impluwensya.
Tungod niini, iyang giingon nga ang usa sa mga paagi nga nakita sa mga kaatbang aron mababagan ang pagdagan ni Duterte mao ang pagpa-impeach kaniya.
Bisan pa niini, nagpakita og pagduha-duha si Garcia nga magmalampuson ang impeachment kung moabot kini sa Senado.
