GENERAL SANTOS CITY – Kasado na sa Mayo 30 hangtod sa Hunyo 1 ang Sarangani Bay Festival 2019.
Sumala ni Sarangani Governor Steve Solon nga mokabat sa 740 ka mga security personnel ang hugot nga magbantay sa tulo ka adlaw nga beach festival sa Sarangani nga neon summer ang tema ning tuiga.
Gibutyag sa gobernador, mas daghan kini kompara kaysa niadtong nakalabay nga tuig nga naa lang sa 500 ka pulis ug militar nga magbantay.
Matud pa ni Gov. Solon, naghatag ug ayuda si AFP Chief General Benjamin Madrigal Jr og ug igong seguridad kung asa magpadala kini ug duha ka naval ship, coastguard, 10 snipping dogs, 30 ka medical personnel, 25 disaster personnel, unom ka ambulances ug duha ka armor vehicle sa Philippine Army.
Daghang beach activities ang giandam sa LGU Sarangani kung asa ang usa highlight mao ang pag-perform sa bandang Rock Steady og Ben and Ben.
Ang SarBay Fest ang gikonsiderang biggest beach festival sa nasud.
Samtang, gisiguro sa kapulisan sa Sarangani ang seguridad sa libuan katao nga makigsadya sa Sarangani Bay Festival 2019.
Matud pa ni P/Lieutant Colonel Jose Teddy Condesa, tigpamaba sa Sarangani Police Provincial Office, giprepara na nila ang contingency plan aron masiguro ang seguridad sa mga mudagsa sa SarBay og mahimong hapsay ang matag aktibidad nga mulungtad og tulo ka adlaw. Katambayayong sa pagbantay ang AFP og uban pang force multipliers.
Samtang gibutyag ni Tourism Officer Marjorie Rudes nga nakigtagbo si Sarangani Governor Steve Solon sa mga otoridad alang sa gipahigayon niining security meeting.
Apan giawhag sa Sarangani Police Provincial Office ang kooperasyon sa katawhan nga mudagsa sa SarBay aron masiguro ang kahapsay ug kalinaw sa maong dakong beach festival.
Samtang, istrikto matud pang ipatuman atol sa SarBay ang smoking ban sa mga pampublikong lugar hilabi na atol sa mga beach activities.
Nagpahimangno si Sarangani First lady Michell Solon sa katawhan nga makigduyog sa SarBay nga dili pwedeng bisan asa na lang magsigarilyo.
Gipahibalo niini sa tanan nga sa 500 ml nga cigarette butts kon upos sa sigarilyo nga makolekta, bayluan kini nila og premyo sama sa kalo, tshirts og uban pang freebies.
Sa pahayag niini ngaa walay makalusot sa maong patakaran tungod nagkatag ang mga pulis ug sundalo nga musita sa mga madakpan nga manigarilyo.
