Nagmando ang Sandiganbayan Fifth Division og 90 ka adlaw nga preventive suspension batok sa tulo ka mga opisyal sa Department of Public Works and Highways (DPWH) kalabot sa mga kaso sa plunder ug graft nga may kalabotan sa giingong mga anomaliya sa flood control projects .
Sa duha ka managlahing resolusyon, ang korte sa anti-graft nagmando sa mga district engineer sa DPWH nga sila si Manny Bulusan ug Arturo Gonzales Jr., ug assistant district engineer nga si Denryl Cortuna nga temporaryong “cease and desist’ sa ilang mga katungdanan o bisan unsang posisyon sa gobyerno.
Sumala sa Sandiganbayan, importante nga ang mga opisyal masuspinde una aron dili sila makaimpluwensya sa imbestigasyon o makahimo og ubang posibleng mga kalapasan samtang nagpadayon pa ang kaso.
Giklaro usab sa korte nga bisan kung ang mga akusado naa sa prisohan, dili kini awtomatikong mopuli sa mandato sa balaod nga nagdili kanila sa pagtuman sa ilang mga katungdanan samtang nag-atubang og mga kaso.
Nahibal-an nga sila si Bulusan, Gonzales, ug Cortuna lakip sa mga kauban nga akusado ni Senador Jinggoy Estrada sa kaso sa plunder nga may kalabotan sa iskandalo sa flood control
Niadtong Hunyo 16, ang Sandiganbayan nagpagawas usab og lahi nga 90 ka adlaw nga preventive suspension order batok kang Estrada.
Ang tulo ka opisyal sa DPWH ug si Estrada kasamtangang gibilanggo sa New Quezon City Jail sa Payatas, Quezon City.
Ang tulo ka opisyal kaniadto miangkon nga “not guilty” sa mga kasong plunder ug graft nga gisang-at batok kanila.
