Gimando sa korte sa Moscow ang pag-aresto kay Yulia Navalnaya, ang asawa sa napatay nga Russian opposition politician nga si Alexey Navalny nga kritiko ni President Vladimir Putin.
Kini human gi-akusahan sa Basmannyy District Court sa Moscow si Navalnaya sa partisipasyon sa usa ka extremist organization.
Ang bana ni Yulia nga si Alexey Navalny ang napatay niadtong Pebrero 16 sa penal colony sa Siberia kung asa ginaserbehan niya ang 19 ka tuig nga sentensiya human mapamatud-an nga guilty sa pagtukod ug usa ka extremist community, nga naga-finance sa extremist activists ug pipila ka mga krimen.
Si Navalny ang highest-profile opposition leader sa Russia ug tinuig nga ginasaway si Putin.
Gi-akusahan ni Yulia si Putin nga mao ang responsable sa kamatayon sa iyang bana.
Gibutyag niini nga gitago sa Russian authorities ang lawas ni Navalny sa katuyuan nga matago usab ang tinuod hinungdan sa kamatayon niini.
Hugot usab nga gipanghimakak sa Kremlin ang alegasyon kabahin sa kamatayon ni Navalny.
