Nahimong viral online ang Origin M1, usa ka humanoid robot head nga gihimo sa Chinese robotics startup nga AheadForm, tungod sa hilabihan ka realistiko nga lihok sa nawong nga halos sama na sa tawo.
Kaya sa robot ang pagsundog sa lain-laing facial expressions sama sa pagkurap, pagpahiyom, paglihok sa mata, ug pagkulubot sa agtang. Apan, adunay mga netizens nga nakurat ug nahadlok tungod sa sobra nga pagkasama niini sa tinuod nga tawo.
Adunay 25 hangtod 42 ka gagmay’ng motors sulod sa silicone nga panit sa robot nga nagsilbing artificial muscles aron makontrol ang mga ekspresyon niini. Aduna usab kini’y camera sa mata, microphone, ug speaker aron makakita, makadungog ug makig-istorya.
Mokabat og $150,000 ang presyo sa labing abante nga bersyon sa Origin M1. Sa pagkakaron, ulo pa lamang ang robot ug gigamit isip demonstration unit samtang padayon pa ang pagpalambo niini.
Plano sa AheadForm nga ikonektar kini sa AI systems aron mas masabtan niini ang gisulti ug emosyon sa tawo, ug makahatag og mas angay nga tubag pinaagi sa tingog ug ekspresyon sa nawong.
