Gitumbok sa National Task Force to End Local Communist Armed Conflict (NTF-ELCAC) nga ang resulta sa bag-o lang natapos nga 2025 midterm elections nagpakita sa pagsupak sa mga botante sa mga party-list nga sakop sa Communist Party of the Philippines – New People’s Army – National Democratic Front (CPP-NPA-NDF).
Matod ni NTF-ELCAC Executive Director Undersecretary Ernesto Torres Jr., ang pre-canvass figures nagpakita nga sa kapin sa 95% sa mga presinto nga nasakup, ang boto alang sa mga party-list nga sakop sa CPP-NPA-NDF mius-os o nahulog ngadto sa 26% kon itandi sa resulta sa miaging eleksyon niadtong 2022.
Matod niya tataw nga supak ang mga Pilipino sa pagpangilad sa maong mga indibidwal ug party-list organizations kalabot sa ilang koneksyon sa mga rebeldeng komunista.
Matod niya nga sulod sa pipila ka tuig, nagdumili sila sa pagkondenar sa bangis nga armadong insurhensiya sa nahisgutang grupo ug karon misanong na ang mga botante pinaagi sa pagkunhod sa kahigayonan nga makalingkod sa Kongreso.
Gipahayag usab sa opisyal sa NTF-ELCAC nga dili na ikatingala nga gigamit sa maong mga party-list ang giingong red-tagging kanila isip pasangil sa ilang kasagmuyo sa resulta sa eleksiyon.
Matod niya nga ang pagbasol sa ilang kapildihan sa pagsaway kanila maoy pagpakamenos sa kapasidad sa mga botanteng Pilipino sa pagtimbang-timbang sa kamatuoran. Gidugang sa opisyal nga ang mga lungsuranon naghimo sa usa ka maalamon nga pagpili ug gisilotan ang paglimbong, dili ang aktibismo.
Ang anti-insurgency task force nagpasalamat sa mga botante sa bag-ohay nga mga eleksyon tungod sa pagmatuod sa makausa pa nga ang umaabot mahimong isulat sa mga balota ug dili pinaagi sa mga bala o kapintasan.
