GENERAL SANTOS CITY – Dili pa sigurado si Police Chief Instr. Renato Salarda kung kinsa ang responsable sa pagpamusil patay sa duha ka gwardiya ni Rodrigo Olarte.
Matud sa hepe sa Makar Police station nga nagpadayon ang ilang imbestigasyon aron mailhan ang pito ka suspek nga namusil nga nagresulta sa pagkamatay nilang security guard Bernard Bernal ug Sixto Bellarmia mga sakop sa RQA security Agency nga nakabasi sa Koronadal City.
Kahinumduman nga gikamang sa mga suspek ang gikahimutangan sa mga gwardiya ni Olarte ug gipamusil gamit ang tag-as nga kalibre sa armas.
Gibasihan sa kapulisan ang nakuha nga mga basiyo sa lugar sama sa caliber 45, carbine rifle, M14, M16 ug nakuha pa sa lugar ang wala mubuto nga bala sa M203.
Alas onse pasado kagahapon dihang nanga-on ang mga biktima dihang madunggan ang sunod-sunod nga buto sa armas apan dayon kining nahilum.
Matud sa opisyal nga nakaangkon ug igo sa ulo ug likod ang duha ka biktima samtang ila usab gikumpirma ang gikaingon nga may babaye nga naigo sa pagpamusil.
