GENERAL SANTOS CITY – Bag-uhay lang nahuman ang master plan alang Queen Tuna Park og posibleng masugdan na sa ulahing kwarter ning tuiga o unang kwarter sa 2022 ang ipahigayong rehabilitasyon sa lugar.
Matud kang Architect Michael Ang, mukabat sa P21 million ang gitagana nga budget alang sa unang phase samtang ginahan-ay pa ang legalidad sa bounderies aron masayran kung asa kutob ang gipanag-iyahan sa siudad.
Gibutyag ni Ang nga hilabihan kanindot og sigurado gayud nga dagsaon sa mga tawo sa Queen Tuna Park kung kini subling ablihan sa publiko.
Subay sa plano, magbutang ug parke, open theather, sunken garden sama sa UST kung asa mamahimong open auditorium, may sunset viewing areas samtang imintina ang beach front og butangan ug mas daghan pang punuan sa kahoy.
Sa pamahayag ni Architect Ang, posibleng tulo hangtod upat ka ‘phases’ ang maong rehabilitasyon una mahuman, hinuon walay timeline nga gihisgotan tungod magdepende sa musunod nga pondo.
