GENSAN- Gipadayag sa Philippine Red Cross ang importansya sa padayon nga pagdonar og dugo aron masiguro nga igo ang suplay alang sa mga pasyenteng nanginahanglan niini.
Sumala ni Merly Gludo, Administrator sa PRC-Sarangani GenSan Chapter, aktibo ang nagkadaiyang barangay ug mga partner organizations sa pagpahigayon og bloodletting activities, apan usahay dili gihapon igo ang makolektang dugo kon itandi sa taas nga demand kon panginahanglan.
Matod niya, sa pagkakaron, natubag pa sa Philippine Red Cross-SARGEN ang mga request sa mga ospital alang sa blood supply, apan kinahanglan nga mapadayon ang regular nga ‘bloodletting activities’ aron dili magkulang ang suplay.
Gipunting ni Gludo nga mas maayo kung matag-adlaw adunay ‘bloodletting activity’ nga makakolekta og dili moubos sa 50 ka bags sa dugo.
Kini tungod kay kapin sa 50 ka bags sa dugo ang kasagarang ginapagawas sa PRC kada adlaw, busa kung gamay ra ang makolekta, posibleng dili mahap-an ang panginahanglan.
Nanawagan si Gludo sa publiko nga mahimong blood donor tungod kay pinaagi sa usa ka donasyon, makatabang sa pagluwas sa kinabuhi sa mga pasyenteng nanginahanglan og dugo
