Nagsang-at ang Save The Philippines Coalition og mga kasong plunder, graft ug technical malversation batok kang Executive Secretary Ralph Recto ug kanhi Presidente sa Philippine Health Insurance Corp. (PhilHealth) nga si Emmanuel Ledesma Jr.
Ang kaso misangpot sa pagbalhin sa P60-bilyon nga sobra nga pondo sa Philhealth ngadto sa nasudnong panudlanan.
Sa usa ka 15-ka-pahina nga reklamo nga gisang-at sa Office of the Ombudsman, nanawagan sila nga tangtangon sila si Recto ug Ledesma gikan sa ilang mga pwesto.
Ang mga nagreklamo, sila si Irene Caballes, Elmer Jugalbot, Gerlyn Ogong, Emerita Pecson, Susan Villar, Mussolini Lidasan, Jose Olivar ug Jaime Miralles, miingon nga ang mga kalapasan nga nahimo sa maong mga opisyal klaro.
Si Recto, kinsa mao ang Finance Secretary niadtong panahona, giingong mipilit nga ibalik ang pondo ngadto sa nasudnong panudlanan bisan pa sa mga pagdili sa balaod.
Samtang si Ledesma angay manubag sa pagtugot sa maong pagbalhin sa pondo.
Kahinumduman nga niadtong Disyembre 3, ang Korte Suprema nagpagawas og mando nga ibalik ang P60-B sa Philhealth, ang pundo nga gideposito sa National Treasury.
