GENSAN – Nanawagan si Mac Pangonotan, presidente sa Pyrotechnic Association sa General Santos City, sa city director sa GSCPO nga buhatan og aksyon ang mga ilegal nga vendor sa pabuto.
Matod niya, nalugi ang mga legal nga negosyante nga nagbayad og buhis, ug dili masiguro sa mga mamalitay ang kalidad ug kaluwasan sa mga pabuto nga ginabaligya sa dili rehistradong tindahan.
Gisiguro usab ni Pangonotan nga ang tanang pabuto nga ginabaligya sa ilang mga miyembro karon sa Oval Plaza kay legal ug rehistrado, nga naggikan sa usa ka pabrika sa Bulacan ug adunay tukmang manufacturer label ug rehistro sa Department of Trade and Industry (DTI).
Gipahimangno sa publiko nga kung mamalit og pabuto, siguroha nga gikan lamang kini sa rehistrado ug legal nga vendor aron malikayan ang aksidente ug masiguro ang kaluwasan.
