Gimonitor ni Atty Jong Gonzales, labaw sa Public safety Office ang deployment sa mga traffic enforcer sugod kagahapon hangtud ugma Nobyembre dos aron masiguro nga han-ay ang dagan sa trapiko atubang sa mga sementeryo.
Matud ni Atty Gonzales nga maghatag ug giya ang mga traffic enforcer aron masiguro nga masunod sa mga motorista ang giandam nga lane.
Gibutyag ni Gonzales nga bisan ug lapad na ang dalan sa syudad hilabi na atubang sa Forest Lake ug Chinese cemetery apan kinahanglan gihapon nga bantayan.
Alang niadtong muadto sa forest lake muagi sa unang lane ug pag-abut sa kanto sa Purok Bagangga, Apopong muliko padulong sa wala ug subayon ang dalan ug pag-abut sa tumoy muliko pag-usab sa wala ug makita ang parking area sa maong sementeryo.
Matud ni Gonzales kadtong mamauli na didto na muagi sa entrance sa forest lake ug kinahanglan nga muliko patuo padulong sa direction sa crossing Makar.
Samtang kadtong mga motorista nga mupadulong sa Polomolok kinahanglan nga muagi sa ikaduha ug ikatulo nga lane.
Lakip gibantayan sa mga traffic enforcer ang mga tawo nga mutabok gikan sa atbang nga adunay mga baligya nga bulak aron mahimong hapsay nga makatabok sa sementeryo.
