GENSAN- Padayon ang pag-monitor sa kapulisan sa mga gasolinahan sa Rehiyon 12 aron masuta kung adunay mga paglapas sama sa hoarding o sobra nga pagtaas sa presyo sa lana.
Sumala ni Police Brigadier General Arnold Ardiente, Regional Director sa Police Regional Office 12, nga ginahimo kini sa pakig-alayon sa Department of Energy aron masiguro ang husto nga implementasyon sa balaod.
Dugang pa niya, kabahin kini sa direktiba sa Presidente nga nagmando sa Philippine National Police nga motabang sa tanang ahensya sa gobyerno may kalabotan sa state of energy emergency.
Sa pagkakaron, wala pa kunoy nadawat nga reklamo ang kapulisan bahin sa sobra nga presyo sa lana sa rehiyon.
Apan gi-awhag ni Ardiente ang publiko nga dayon i-report ang bisan unsang iregularidad sa pinakaduol nga police station aron mahatagan kini og aksyon.
Bisan adunay mga report sa ubang lugar sa nasud, gipatin-aw niya nga sa Rehiyon 12, malinawon pa ug wala pay natalang paglapas sa presyo sa produktong petrolyo.
