Giawhag sa Police Regional Office 12 ang mga ginikanan ug personahe sa mga tulunghaan nga mas palig-onon ang pagmonitor sa online activities sa mga menor de edad, ilabina human mikatag sa social media ang mga post nga adunay hulga batok sa mga eskwelahan sa rehiyon.
Sumala sa PRO 12, seryoso nilang gitagad ang maong mga post ug padayon ang imbestigasyon aron mailhan ang mga indibidwal nga anaa sa luyo niini.
Nasayran usab nga adunay pipila ka menor de edad nga nalambigit sa pagmugna ug pagpakaylap sa maong mga hulga.
Matud ni Regional Director PBGen. Alan B. Manibog, importante nga magpabiling kalmado ang publiko ug dili dayon motuo o mopakaylap sa mga impormasyon nga wala pa mapamatud-an.
Gipahinumdoman usab ang mga ginikanan nga bantayan ang social media groups ug online platforms nga gisalmutan sa ilang mga anak aron malikayan ang mga kalihukan nga mahimong hulga sa seguridad.
Gipasidan-an sa kapulisan nga ang paghimo ug pagpakaylap og online threats mahimong adunay katugbang nga kriminal nga silot ubos sa Republic Act No. 10175 o Cybercrime Prevention Act of 2012.
