Posibleng mosaka og P1.00 hangtod P1.50 kada litro ang presyo sa gasolina, diesel ug kerosene sa sunod semana base sa upat ka adlaw nga trading sa Mean of Platts Singapore, sumala sa Department of Energy niadtong Biyernes, Mayo 22.
Matud ni DOE Oil Industry Management Bureau Director Rino Abad, mikunhod ang presyo sa diesel gikan sa $163 ngadto sa $156 kada bariles sa ika-upat nga adlaw sa binayloay, ug posible pang moubos og dugang P0.50 ang projected increase kung magpadayon ang maong paglihok sa presyo sa katapusang adlaw sa trading.
Samtang, miingon usab si Abad nga nakaapil na sa programa sa gobyerno nga P10 diesel subsidy alang sa mga public utility vehicle o PUVs ang 970 ka gasolinahan, ug gilauman nga molapas pa kini sa 1,000 sunod semana samtang nagpadayon ang DOE sa pagbisita ug pagtudlo sa mga gasolinahan sa sistema nga gamiton sa subsidy program, nga plano usab himuong standard platform sa umaabot nga mga ayuda puli sa cash distribution system.
