GENSAN – Hugot na ang preparasyon sa lokal nga panggamhanan alang sa Kalilangan 2026 og Foundation Anniversary sa dakbayan. Matud ni Joey Conception, ang Festival Director, daghang aktibidad ang giandam nga gikahinaman usab sa katawhan.
Gibutyag niini, sama sa mga milabay nga mga kalilangan, ning tuiga, musentro gihapon sa pagsaulog sa kultura sa mga Blaan, Muslim og uban pang tribo sa syudad ang upat ka adlaw nga festival.
Gidugang niini, ang Pioneer Avenue maoy sentro sa mga aktibidad ilabina sa opening (Pebrero 23) og closing ceremony( Pebrero 27).
Apan sa Pebrero 22 pa lamang, adunay ipahigayon nga interfaith fellowship sa Pioneer Avenue.
Anaa gihapon ang tribal village sa Plaza ng Heneral Santos nga magpakita sa lain laing kultura.
Gibutyag ni Conception nga surpresa ang mamahimong mga bisita nga artista atol sa opening og culmination day.
Apan sa culmination day, adunay ipahigayon nga kapehan, parada ng Lahi, Kagsagayan Festival og uban pang aktibidad.
Kahibaluan nga nadeklara ang Pebrero 27 isip special non-working day sa dakbayan sa General Santos.
