GENERAL SANTOS CITY – Padayon ang lalom nga imbestigasyon sa kapulisan sa pagkamatay sa usa ka Korean national nga nakaplagan ang patayng lawas niini sulod sa usa ka kotse sa Purok Masagana, Barangay Baluan ning syudad.
Matud ni P/Major Rissa Hernaez, tigpamaba sa General Santos City Police Office (GSCPO) wala pa silay lead kun kinsa ang mga responsable sa pagpatay kang Hyun Seong Hong, hamtong ang pangidaron, usa ka contractor bidder nga residente sa Brgy. Labangal.
Nakig-alayon na ang GSCPO sa Bureau of Immigration and Deportation (BID) aron makontak ang pamilya sa biktima pinaagi sa Korean Embassy.
Apan sa pamahayag ni BID Alien Control Officer Julius Jamorabon nga dili na muagi sa ilang buhatan ang pagproseso sa mga papeles sa biktima tungod ang embahada na ang muhikutar sa mga dokumento tungod patay na ang biktima.
Kahibaluan nakaplagan ang biktima sa passenger side sa likod nga bahin sa puti nga kotse may plate number NAO 1882.
Adunay mga samad pinusilan sa nagdaiyang parte sa lawas ang biktima og patay na.
Samtang gamitong ebidensya sa kapulisan sa krimen ang narekober nilang basyo sa wala matino nga kalibre sa pusil ug usa ka container nga adunay unom ka litro nga gasolina.
Matud sa kapulisan nga gidauban ang kotse apan igo lang nasunog ang driver seat ug wala na midako pa ang kalayo.
Gituhu-an nga kung naabot sa kalayo kadtong gasolina posebling musilaob ang tibuok sakyanan ug maapil kasunog ang biktima.
