Gimanduan ni Philippine National Police Acting Chief Lt. Gen. Jose Melencio Nartatez Jr. ang Criminal Investigation and Detection Group nga sutaon kung asa gikan ang kapin sa P15 milyones nga relief goods nga nasakmit gikan sa usa ka negosyante sa Manila.
Ang mga nasakmit nga relief goods gitimbrehan sa Department of Social Welfare and Development (DSWD).
Matod ni Nartatez nga nagpadayon ang ilang imbestigasyon ug ilang gisundan ang mga lead nga posibleng magpakita sa kalambigitan sa ubang mga indibidwal.
Nagtuo sila nga dili kini buhat sa usa ka tawo ug determinado sila nga mailhan ang tibuuk nga grupo nga nagpaluyo sa ilegal nga pagbaligya.
Gipasalig usab niya nga manubag ang tanang nagkunsabo aron makaganansya sa relief goods alang sa mga katagilungsod.
Gimanduan ang CIDG sa pagsubay sa tibuok supply chain sa mga nasakmit nga relief goods: gikan sa tinubdan niini hangtod sa ilegal nga pagbaligya niini sa black market.
Tumong sa imbestigasyon nga mailhan dili lang ang mga small-time operators kon dili lakip na ang mga dagkong sindikato ug posibleng mga insider nga migamit sa kabtangan sa gobyerno alang sa personal nga ganansya.
