Pipila ka mga pamilya sa giingong mga biktima sa Extra Judicial Killings nikompirma nga nangandam na sila sa pag-atubang sa International Criminal Court alang sa paghusay sa kasong Crime Against Humanity ni kanhi Presidente Rodrigo Roa Duterte.
Kasamtangang gitanggong si Duterte sa The Hague, Netherlands human madakpi sa Pilipinas. Matod ni alyas Mira, igsuon sa duha ka biktima sa EJK, giandam na nila ang ilang aplikasyon aron makaapil sa hearing.
Matod niya nga ang tuyo lang sa ilang pag-apil mao ang pagpakita nga tinuod ug naglungtad ang mga biktima sa dugoong gubat batok sa drugas sa miaging administrasyon. Giangkon usab niini nga daghang pamilya sa mga biktima ang nahadlok nga motunga.
Base sa datos nga gisumitir sa ICC registry ngadto sa Pre-Trial Chamber I, moabot sa 200 ka representante sa kapin 2,000 ka biktima sa EJKs ug kapin 1500 ka pamilya ang ilang gikonsulta.
Kini nga konsultasyon alang sa kasong crimes against humanity sa kanhi presidente. Gipasalig sa ICC nga magpabiling confidential ang tanang giila nga biktima.
