GENERAL SANTOS CITY – Nakauli na sa dakbayan ang Pinay DH nga matud pa gimolestiya sa anak sa iyang amo didto sa Riyadh, Saudi Arabia.
Sa exclusibong pakighinabi sa Bombo Radyo, gibutyag sa nahisgutang OFW nga si Alyas Lyn, 31-anyos, taga-Brgy Fatima ning dakbayan, nga bisan ug naluwas ug nakauli na dinhi sa dakbayan, apan gibati gihapon ug trauma.
Ug gani, daw sa malisod gihapon alang kaniya sa pagsaysay sa nahitabo. Matud pa, lima ka bulan pa lamang siyang nagtrabaho sa nasampit nga nasud, kung asa nahitabo ang insidente kaniadtong Agosto 3, dihang wala ang mga ginikanan sa suspek nga iyang amo.
Samtang gaplantsa matud pa siya, gipugos siya sa suspek nga pasudlon sa lawak niini. Misulay matud pa siya ug sukol ug naningkamot nga makawala apan mas kusgan gayud ang suspek, ug nangluya siya sa pagpangusog, hinungdan nga nagmalampuson sa dautang plano kaniya.
Ang pait pa, dihang gisumbong matud pa niya sa mga amo ang gihimo sa kaniya sa ilang anak, daw sa gibali matud pa hinuon, ug gipasanginlan nga basin siya ang nag-una-una sa ilang anak hinungdan nga nahimo kadto kaniya. Hinungdan nga nanawag si Lyn sa iyang agency, nga paspas usab sa pag-aksyon nga maoy namugos sa iyang amo aron makuha si Lyn.
Apan una siya nakahawa kanila, gibungkag matud pa ang iyang mga maleta ug bagahe, tungod basin ug gikawatan sila.
Bisan paman, mapasalamaton matud pa si Lyn sa iyang agency sa paspas nga aksyon ug tabang kaniya, kung asa pagka-petsa 9 nakabiyahe na siya pauli sa nasud, kung asa wala matud pa siya gipasagdan bisan pag-abot sa Kauluhan, hangtod nga nakauli siya sa dakbayan kagahapong adlawa, kung asa gisugat siya sa iyang pamilya sa airport.
Samtang, sa karon, hinabion una matud pa niya ang iyang bana ug ubang kabanay, ayha magdesisyon kon unsa ang mamahimo nilang lakang, kon magpasaka ba ug kaso, alang sa pagkab-ot sa hustisya.
Hinuon, gawas sa iyang agency, mapasalamaton matud pa siya sa embassy didto sa Riyadh gumikan sa pagtabang kaniya.
Samtang, gisaysay usab sa iyang bana nga si Danilo ang gibati nga kaguol ug kabalaka human sa nadangatan sa iyang asawa didto sa laing nasud, hinungdan nga walay puas ang pagkontakanay nila hangtod nga makauli dinhi sa nasud.
Matud pa nga sukad gitawgan sa iyang asawa ug gipahibalo sa nahitabo kaniya kaniadtong Agosto 11, ingon na lang ang iyang kasuko ug kasakit nga gibati, apan gisabot ug gidawat na lang ang tanan, gumikan nabiktima lamang ang asawa.
Sa karon mapasalamaton matud pa sila nga nakauli na ang asawa nga buhi ug makaistorya ug tarong.
Wala matud pa sila makasiguro kon ihinayon ang pagpasang-at ug kaso sa suspek nga taas-taas matud pa nga proseso, o kon magpabayad na lang ug damage, apil na ang pipila ka bulan nga nakalatid sa kontrata, nga wala nahuman sa iyang asawa tungod sa nahitabo.
