Nagpaabot og pasalamat ang Philippine Coast Guard (PCG)ngadto kang Presidente Ferdinand R. Marcos Jr. sa pag-aprobar sa dul-an P26 bilyones nga pundo alang sa pagpalit sa 40 ka units sa 35-meter Fast Patrol Craft kon FPC.
Matud ni PCG Commandant Admiral Ronnie Gil Gavan, dako og tabang ang FPCs sa pagpatuman sa balaod sa kadagatan, pagsumpo sa illegal nga drugas, terorismo, ug mga kaso sa human trafficking, ingon man sa pagpahigayon og search and rescue, ug disaster response.
Diin 20 ka FPC units ang paliton gikan sa France, samtang ang nahabilin nga 20 kay itukod sa Pilipinas, nga gilauman nga makapalig-on sa kapabilidad sa paghimo og barko sa nasud.
Kabahin usab niini nga proyekto ang 9-year logistics support program ug dugang nga kagamitan sa pagsuporta alang sa giila nga mga base sa PCG.
Hinungdan nga gidayeg ni Admiral Gavan ang suporta sa Presidente sa modernisasyon sa PCG nga makatabang sa ilang pasalig sa pagpanalipod sa interes sa kadagatan sa nasud ug paghatag og seguridad sa kinabuhi sa matag Pilipino.
