Gisuportahan ni Presidente Ferdinand Marcos Jr. ang gitakdang deklarasyon sa Department of Agriculture (DA) sa Food Security Emergency sa bugas sa nasud.
Sa pakighinabi kang Pang. Marcos sa mga katawhan sa Leyte miuyon siya sa maong rekomendasyon sa National Price Coordinating Council (NPCC).
Sa ambush interview sa Leyte karong adlawa, ang presidente nagbutyag nga nagpaabot na lang siya nga pormal na nga madawat sa Departament of Agriculture ang rekomendasyon sunod semana.
Gipasabot sa Presidente, kini nga lakang himuon aron mugana og tama ang merkado sa pag-presyo sa bugas.
Matod niya nga bisan pa sa mga lakang nga gihimo sa gobyerno, wala gihapon mous-os ang presyo sa bugas.
Dugang pa niya nga ang merkado wala magsunod sa balaod sa suplay ug panginahanglan.
Busa matod niya kinahanglan nga pugson ang pagpaus-os sa presyo sa bugas ug pagsiguro nga maayo ang pagpresyo sa mga merkado.
Dugang pa sa Pangulo nga duna pay laing hinungdan nga ilegal ang pagsaka sa presyo maong gisusi na kini karon sa Kamara.
