Mihatag og pasidungog si Presidente Ferdinand Marcos Jr. sa mga Overseas Filipino Workers sa Lao People’s Democratic Republic.
Sa iyang pakigpulong ngadto sa gatusan ka mga miyembro sa Filipino Community sa Laos, ang Presidente miila sa ilang kontribusyon lakip na ang mga magtutudlo nga nag-umol sa umaabot nga mga lider sa maong nasud, mga enhinyero nga nagpalig-on sa ilang ekonomikanhong seguridad, ug mga hospitality providers nga naghatag sa talagsaong serbisyo nga ilang nakat-unan gikan sa Pilipinas.
Lakip usab ang mga ehekutibo nga nagdasig sa ilang komunidad sa negosyo sa paghimo og mga oportunidad alang sa pamatigayon ug pagpamuhunan, ug uban pang mga eksperto ug mga propesyonal nga nag-ambit sa ilang mga kahanas ug abilidad alang sa kalamboan sa katilingban.
Matod ni Pang Marcos, makita ang maayong kalibre ug taas nga pagtamod sa mga taga Laos sa mga Pilipino, ug kini ang pruweba nga ang talento sa mga Pilipino mopatigbabaw bisan asa sa kalibutan.
Kalabot niini, gitambagan sila nga magpadayon sa pagka ambassador sa kaligdong Pilipino.
