Nahimong tensiyunado ang kahimtang sa usa ka Bangko, ang Capitec Bank human usa ka pamilya ang wala na makapugong sa ilang kalagot ug gidala ang patay’ng lawas sa ilang kabanay sulod mismo sa opisina sa bangko.
Base sa mga report ug mga video nga nikatap sa social media, makita ang patay’ng lawas nga giputos ug gipahimutang sa sawog duol sa customer service area. Sumala sa pamilya, napugos sila sa paghimo sa maong aksiyon isip ebidensiya sa kamatayon sa ilang kabanay human sila maglisod sa pag-claim sa ilang funeral insurance.
Tungod sa maong insidente, daling gipagawas ang mga empleyado ug mga kustomer, ug temporaryong gipasira ang maong bangko alang sa seguridad ug sanitasyon. Sa pikas bahin, nagpagawas og pahayag ang kadagkoan sa bangko aron pagklaro sa proseso.
Ilang gipahinumdoman ang mga kliyente nga ang death certificate lamang ang gikinahanglan aron ma-proseso ang bisan unsang claim. Gipasabot sa buhatan nga Death Certificate lang ang dad-on og dili ang patayng lawas.
Gisusi na karon sa maong kompanya ang maong hitabo aron masiguro nga dili na masubli ang susamang makapakurat nga eksena.
