Nakuha sa Olympian sa Paris nga si Aira Villegas ang silver medal para sa Pilipinas human napildi kang Chuthamat Raksat sa Thailand pinaagi sa unanimous decision sa women’s 50kg boxing final sa SEA Games 2025 Thailand.
Napakyas si Villegas sa pag-angkon sa unang gold medal sa Pilipinas sa boxing sa maong biennial met, diin ang away ang gipahigayon sa Chulalongkorn University Sports Center sa Bangkok.
Agresibo ang pagsugod sa Filipina boxer apan wala kini mapadayon, diin sa katapusan si Raksat ang nakakuha sa mas klaro nga mga points.
Ang tanang lima ka hurado mi-iskor sa away pabor kang Raksat, kinsa usa sa 16 ka Thai boxers nga nakigkompetensya sa gold medal matches sa katapusang adlaw sa kompetisyon.
Kini ang ikaduhang medalya ni Villegas sa SEA Games, human sa bronze sa 2019 SEA Games sa kaugalingong nasud, diin siya nakigkompetensya sa bantamweight.
Sa 2024 Paris Olympics, nakadaog si Villegas og bronze samtang nakig-away sa light-flyweight division.
Samtang tulo pa ka mga Pilipino ang magtigi alang sa bulawang medalya nga mao sila si Eumir Marcial, Flint Jara, ug Jay Brian Baricuatro.
