Giawhag ni Senador Francis “Kiko” Pangilinan si Department of Justice (DOJ) Secretary Jesus Crispin “Boying” Remulla nga “magmatngon” una pa mohatag og proteksyon isip state witness sa mga nalambigit sa kontrobersiya sa kurapsyon sa mga proyekto sa pagbaha.
Gihangyo sa senador si Remulla nga ibutang sa record nga sa higayon nga madawat na ang usa ka tao isip state witness, awtomatik siyang adunay immunity sa mga kasong kriminal ug sibil, lakip na ang dili obligado nga iuli ang mga kinawat nga pundo.
Human gikompirma ni Remulla ang nasangpit nga punto, gipasiugda ni Pangilinan ang panginahanglan nga mahimong mas mapilion sa pagdawat sa mga aplikante isip state witness.
Sa pagkakaron, ang mga contractor nga sila Curlee ug Sarah Discaya ug kanhi mga opisyal sa Department of Public Works and Highways (DPWH), kanhi undersecretary Roberto Bernardo ug kanhi Bulacan district engineers Henry Alcantara, Brice Hernandez, ug Jaypee Mendoza, gikonsidera nga “protected witnesses” sa DOJ.
Nag-aplay sila nga mahimong state witness ug mabutang sa ilawom sa witness protection program human maghatag ug mga pahayag nga naglambigit sa pipila ka dagkong opisyal sa gobyerno sa multi-billion pesos nga anomaliya sa flood control projects.
Si Pangilinan nipadayag og kabalaka nga dili na mabawi sa estado ang mga kinawat nga pundo kung dawaton ang mga indibidwal isip state witness.
Una nang gipasabot sa senador nga ang mga saksi, sama ni Hernandez nga boluntaryong mitahan sa mga luhong sakyanan, mahimong boluntaryong mouli sa mga kinawat nga kabtangan isip pagpakita sa maayong kabubut-on ug kooperasyon.
