Nagkaguliyang ang usa ka pamilya sa Alexandria, Virginia, human makuha sa ilang doorbell camera ang hulagway sa tulo ka tawo nga nagsul-ob ug mga makahadlok nga kostum niadtong Oktubre 17.
Ang mga tawo nakit-an nga nagduol sa ilang pultahan, hinungdan nga nagduda ang pamilya ug mipasaka kini ug reklamo nga posibleng tinguha sa pagpangawat.
Tungod niini, nagsugod dayon ug imbestigasyon ang Alexandria Police Department ug nangayo ug tabang sa publiko aron makuha ang dugang impormasyon ug tan-awon ang footage sa ubang security camera sa duol.
Apan sa ulahi, nakumpirma sa kapulisan nga ang tulo ka tawo mao ang mga tin-edyer nga paryente sa tag-iya sa balay.
Giingon usab nga adunay tulo ka hamtong ug usa ka bata nga nitabang kanila sa maong prank.
Matod pa ni Police Chief Tarrick McGuire, dakong “moral failure” ang nahitabo tungod kay bisan pa nga binuang lang kini, posible nga miresulta sa makamatay nga insidente.
Gisaysay pa niya nga tungod sa kahadlok sa mga residente nga basin tinuod nga kawatan, ilang gipahibalo ang usa pa ka paryente nga miadto sa balay nga may dala nga armas. Walay gisang-at nga kaso batok sa mga nalambigit sa maong insidente.
