GENSAN- Hugtanon nga gikondina og nagsinggit usab ug hustisya ang pamilya sa traysikol driver og nurse nga namatay sa pagpamusil nga natigayon kagahapon sa Aparente St. Barangay City Heights, Gensan.
Giila ang biktima nga si Iven Miano Conde, 33 anyos, residente sa Lower Nopol Klinan 5 Brgy. Mabuhay.
Samtang, nadamay ang pasahero niini nga usa ka nurse nga giila nga si Nhiezer Rolliene Jane Aguacito, 24 anyos, residente sa Oringo Subd. Brgy. City Heights.
Matud sa inahan sa traysikol driver, blangko sila sa motibo sa pagpusil sa iyang anak tungod kay wala silay nahibal-an nga adunay nakalaban ang nasampit.
Sa nahimong pamahayag ni Police Major Ivan Charles Abastillas, Station commander sa San Isidro Police Station nga nag-review na sila sa mga CCTV aron makakuha og footages nga makatabang sa pag-ila sa mga suspek.
Sumala sa opisyal nga sa karun nagpadayon ang ilang imbestigasyon alang sa posibleng pagsuta sa motibo ingon man pagsikop sa mga suspek.
