Gihagit sa Malacañang ang kampo ni Vice President Sara Duterte nga tubagon ang alegasyon sa iyang wala matugkad nga bahandi imbes maghimo og mga istorya bahin sa posibleng paglangay o pag-undang sa 2028 elections.
Kini ang tubag ni Presidential Communications Office Undersecretary ug Palace Press Officer Atty. Claire Castro sa pahayag ni Atty. Salvador Paolo Panelo Jr., tigpamaba ni VP Sara, bahin sa giingong mga diskusyon sa Kamara nga posibleng i-postpone ang 2028 elections.
Matod ni Castro, busy si Presidente Ferdinand Marcos Jr. sa sunod-sunod nga miting ug mga buluhaton, busa wala kini panahon sa mga intriga nga iyang gihulagway nga hinimo-himo lamang.
Dugang pa sa opisyal, ang angay ipatin-aw sa kampo ni Duterte ngadto sa publiko mao ang kamatuoran bahin sa alegasyon sa unexplained wealth o bahandi nga wala matugkad ang gigikanan, lakip na ang kabtangan sa iyang pamilya.
Una nang miingon si Panelo nga nakadawat siya og impormasyon bahin sa mga diskusyon sa Kamara nga posibleng maglangay sa pagpatuman sa 2028 elections.











