Gisusi pa sa Department of Migrant Workers (DMW) ang giingong pamahayag nga gipagawas sa mga rebeldeng Houthi nga ilang gihuptan ang 16 ka Pinoy nga tripulante sa MV Eternity C.
Atol sa usa ka press briefing sa Malacañang, gibutyag ni DMW Secretary Hans Leo Cacdac nga sila hugot nga nakig-alayon sa Department of Foreign Affairs (DFA) bahin niini.
Matod niya nga nakadawat sila og duha ka mga pamahayag, diin ang usa nag-ingon nga ang grupo naghupot sa mga tripulante samtang ang usa gikan sa Estados Unidos, nga nanghimakak sa pamahayag sa mga rebelde.
Sa laing bahin, gibutyag ni Cacdac nga anaa sa maayong kondisyon ang lima ka tripulante nga na-rescue, apan dili nila ibutyag ang ilang nahimutangan alang sa ilang kaluwasan.
Kasamtangan silang nagpahuway ug gipailawom sa saktong medikal attention una pa nila ibutyag ang detalye sa tibuok insidente.
Adunay sakay nga 25 crew ang maong cargo ship dihang maigo sa gilusad nga ballistic og cruise missiles sa Houthis.
Kasagaran sa mga crew nga sakay sa giatake nga cargo ship ang 21 ka Pinoy seafarers og aduna usab Russian national nga grabeng nasamdan og naputlan og tiil.
Ang Eternity C ang ikaduhang barko sa sulod sa duha ka adlaw nga gipaunlod sa Houthis og ikaupat human sa pag-atake sa rebeldeng grupo sa MV Magic Seas, MV Rubymar og MV Tutor.
