GENSAN– Nanawagan si City Councilor Dominador Lagare sa katawhan nga unta mas lig-on pa ang suporta ug pag-advocate sa pagsakay sa mga yellow plate nga traysikol sa syudad.
Matod pa sa konsehal, kini nga mga traysikol mao ang legal nga gihatagan og prangkisa ug gitugotan sa balaod nga mamasada sa kalsada sa General Santos.
Iyang gipadayag nga ang tumong sa lokal nga pangagamhanan mao ang paghatag seguridad sa mga commuters ug proteksyon sa ilang kaluwasan.
Giila sa LGU nga ang pagsuporta sa yellow plate drivers usa ka pamaagi aron masiguro nga ang katawhan mosakay sa mga traysikol nga legal ug nagasunod sa balaod.
Gisugdan na usab ang hugot nga pagpatuman sa Ordinance No. 37 ug Ordinance No. 21 nga adunay kalabotan sa franchising sa mga traysikol sa GenSan.
Kini nga mga ordinansa mao ang naglatid sa proseso ug regulasyon sa pagpamasada sa syudad.
Gikatakda usab nga susihon og tan-awon pag-usab ang maong ordinansa aron mas daghang taga-GenSan ang makabenepisyo sa prangkisa ug aron malikayan ang padayon nga pagdaghan sa kolorum nga mga traysikol.
