Gitun-an sa Department of Health (DOH) ang paghatag ug libreng serbisyong medikal alang sa tanang ospital nga gidumala sa gobyerno sa tibuok nasod.
Matod ni Health Secretary Ted Herbosa, ang mga indibidwal gikan sa mga panimalay nga ubos ang kita lakip na ang mga benepisyaryo sa Pantawid Pamilyang Pilipino Program (4Ps) ang kwalipikado sa libreng serbisyong medikal.
Dugang pa sa kalihim nga ilang gitun-an ang posibilidad nga malibre ang hangtod sa 99% sa mga serbisyo sa tanang ward ug semi-private sa mga publikong tambalanan nga matod pa niya masakop sa koleksiyon gikan sa sin tax.
Kalabot niini, gikatakdang makigtagbo ang kalihim sa mga direktor sa mga publikong tambalanan ug gipaabot nga sunod semana na ang pahibalo.
Nanghinaot ang kadagkoan sa DOH nga matubag sa mga magbabalaod ang bisan unsang mga kakulian sanglit sila man ang naghatag og pundo sa DOH.
Kini nga inisyatibo sa DOH nagtumong sa pagpalapad pa sa access sa dekalidad nga pag-atiman sa panglawas ug pagpakunhod gikan sa bulsa nga gasto alang sa minilyon nga mga Pilipino nga kinahanglan magpatambal sa mga pampublikong ospital.
Kini base usab sa mandato sa Universal Health Care Law nga mas mapalig-on pa ang healthcare system sa nasud.
