Gisugdan na sa Bureau of Fisheries and Aquatic Resources ang pag-apod-apod og fuel subsidies sa mga mananagat nga naapektuhan sa oil spill sa Manila Bay.
Matod sa BFAR, dungan kini sa padayong pagtutok sa ahensya sa kahimtang sa mga mananagat nga nawalaan ug nalimitahan sa pagpanagat tungod sa oil spill.
Matag mananagat nga unang giila nga apektado makadawat og P3,000 nga fuel subsidy, gawas sa relief packs nga nadawat.
Gipasalig sa ahensya nga magpadayon kini ug hatagan ang mga giila nga mananagat aron matabangan sila nga mabuntog ang epekto sa oil spill.
Base sa rekord sa BFAR, adunay 46,000 ka mananagat ang narehistro sa tulo ka rehiyon nga apektado ug naabot sa oil spill: Central Luzon, NCR, ug CALABARZON.
Una nang mitaho ang DA nga giproseso na niini ang P1 bilyon nga quick response fund (QRF) aron matabangan ang mga mananagat nga makabangon gikan sa epekto sa oil spill sa ilang panginabuhian.
