GENERAL SANTOS CITY -Miabot na sa siyudad si WBA welterweight champion ug Sen. Manny Pacquiao kauban ang tibuok Team Pacquiao, kagahapong adlawa.
Kini alang sa ikaduhang bahin sa iyang training camp alang sa away kang Adrien Broner sa Enero 19, sa MGM Grand Arena sa Las Vegas.
Sa pakighinabi sa Bombo Radyo kang Aquiles Zonio, tigpamaba ni Pacquiao, gibutyag niini nga nakasinati ug over-fatigue ang fighting senator, human nga ginadungan ang pagbansay ug trabaho sa Senado.
Ug gani, nagka-muscle cramps matud pa si Pacman sa iyang sparring session kagahapon sa hapon. Sumala pa nga dihang tua pa sa Maynila, ga-jogging ang Pinoy ring icon sa buntag, samtang pag-uli gikan sa Senado ga-basketball pa kini sa gabii.
Hinungdan nga ginatambagan matud pa kini nga mugahin usab ug panahon aron magpaghulay.
Bisan paman, wala matud pay angayang kabalak-an ang mga fans ni Pacquiao tungod sagad matud pa kining mahitabo hilabi na matag training camp niini.
Posibleng tungod matud pa sa edad niya, apan gipasalig nga makabawi ra si Manny.
Samtang, ning adlawa gilaumang mag-jogging si fighting senator Manny Pacquiao ang Team Pacquiao sa Tinoto, Maasim sa Sarangani.
Matud ni Zonio, sa training camp niini karon dinhi sa siyudad, matag Lunes, Miyerkules ug Biyernes, mag-jogging si Manny kauban ang Team Pacquiao sa Tinoto, Maasim; samtang matag Martes, Huwebes ug Sabado sa Antonio C. Acharon Sports Complex, ug sa hapon ang training sa Wild Card Gym kauban silang Head Coach Buboy Fernandez, Nonoy Neri, Conditioning Coach Justin Fortune, Coach Freddie Roach, Australian spar mate George Kambosos Jr., ug lain pang usa ka sparring partner.
Nasayran nga sa Disyembre 17, magsaulog si Sen. Pacquiao sa iyang ika-40 nga adlaw’ng natawhan dinhi sa siyudad, kung asa usa na usab ka bongga nga selebrasyon ang matigayon.
Samtang sa Disyembre 21 mulupad ang Team Pacquiao sa Kauluhan alang sa biyahe pa-Amerika sa petsa 22. Matigayon ang Pacquiao-Broner fight sa Enero 19, sa MGM Grand Arena sa Las Vegas.
Gikumpirma usab ni Zonio nga ania usab sa siyudad ang mga crew sa Showtime, ang American premium cable ug satellite television network.
Miabot matud pa ang mga nahisgutan miaging semana, aron i-cover ang training camp ni Pacquiao alang sa umaabot nga away kang Broner.
Nasayran nga gikonsiderang “shortest training camp” karon ang pagbansay ni Manny sa away, base matud pa sa pahayag ni Conditioning Coach Justine Fortune.
Apan siguraduhon matud pa niini nga anaa sa 100 percent nga kondisyon ang Pinoy ring icon pag-abot sa adlaw sa away, ug dili niini pakyason ang tanang kababayan nga misuporta kaniya.
Dungan niini, nanawagan ang tibuok Team Pacquiao ngadto sa tanang kababayan nga suportahan ug i-ampo ang umaabot nga away sa gikonsiderang Pambansang Kamao alang sa malampuson nga resulta.
