Gipaimbestigahan sa mga Kongresista ang anaa sa P15.5 billion nga advance payment nga gihatag sa Philippine Health Insurance Corporation (PhilHealth) sa mga ospital ilawom sa kontrobersyal nga Interim Reimbursement Mechanism ukon IRM program.
Sa pagdungog sa House Committee on Appropriations, gisusi sa mga kongresista ang legalidad ug pagka-transparent sa maong programa nga gipatuman sa administrasyong Duterte.
Matud ni Gabriela Party-list Rep. Arlene Brosas adunay mga alegasyon nga nauli lamang sa bulsa sa mga ‘corrupt’ nga opisyal ang pondo nga gipagawas sa PhilHealth.
Gisaway usab ni Brosas ang kapakyasan sa representante sa Philhealth nga matubag ang tanang mga pangutana kalabutan sa programa nga gipatuman sa nakalabay nga administrasyon.
Gikuwestyon usab ni House Deputy Majority Leader ug Iloilo 1st District Rep. Janette Garin ang legalidad sa paggamit sa pondo sa PhilHealth aron mahimong kapital sa mga pribadong ospital ug ospital sa gobyerno.
Gikuwestyon usab ni Appropriations panel vice chair Marikina City 2nd District Rep. Stella Quimbo kung paunsa gipili ang mga ospital nga hatagan ug pondo gikan sa IRM program nga gipatuman atol sa COVID-19 pandemic.
