GENERAL SANTOS CITY – Padayong gibaha ang pipila ka mga lugar sa Houston, Texas, gumikan sa paghapak ni Hurricane Harvey.
Kini ang gibutyag ni Gwenever McDonald, taga Gensan nga gatrabaho isip hospital staff sa Memorial Hermann Hospital sa Harris County sa Houston, Texas, pinaagi sa gipadala niining mensahe sa Bombo Radyo.
Sumala pa nga naka-lockdown gihapon ang gitrabahuan niining ospital sukad pa kaniadtong Sabado, ug 50% sa iyang mga katrabaho sa department ang nabahaan usab.
Nagkatag ug nagkaguliyang usab matud pa ang sitwasyon sa downtown area gumikan sa bagyo, ug sirado pa ang mga establisyimento.
Samtang padayon matud pa ang pag-ulan sa mga kasikbit-siyudad hilabi na paingon sa Louisiana kung asa subling naglandfall ang bagyo.
Sirado usab matud pa ang dalan paingon sa Kingwood gumikan gihapon sa pagbaha.
Nagpabilin usab matud pang sirado ang duha ka airport sa Houston, ang George Bush ug William P. Hobby International Airport.
Bisan paman, samtang gikahinabi ang naasoy’ng OFW, miundang na matud pa ang pag-ulan sa gikahimutangan niining ospital ug passable na usab ang mga kalsada pasulod ug pagawas sa trabaho.
