Kusganong gikondena sa Office of Civil Defense (OCD) ang paggamit sa Emergency Cell Broadcast System (ECBS) alang sa pagpangampanya niining nasyonal ug lokal nga piniliay.
Kini human nakadawat og taho ang ilang buhatan nga daghang mga residente gikan sa mga probinsiya ang nakadawat og mga mensahe nga nag-awhag kanila sa pagbotar sa mga piho nga kandidato.
Sa gipagawas nga pamahayag sa OCD, gipasiugda sa ahensya nga ang paggamit sa ECBS isip kabahin sa pagpangampanya sa mga kandidato karong eleksyon hugot nga gidili ug delikado.
Matod sa ahensya, ang ECBS dili angay gamiton sa pagpangampanya ug para lamang sa paghatag ug informative live-saving alerts panahon sa mga emerhensiya sama sa linog, bagyo ug uban pang sitwasyon nga makaapektar sa seguridad sa publiko.
Ang paggamit niini alang sa politikanhong katuyoan mahimong makaapekto sa pag-apod-apod sa mga emergency alert ug mahimong usa ka nagsingabot nga hulga sa kinabuhi sa mga Filipino citizen.
Sa laing bahin, gipahinumdoman sa ahensya ang mga kandidato nga ang ECBS gigamit alang sa dinalian nga mga abiso sa emerhensya ug dili gamiton nga plataporma sa kampanya tungod kay mahimo’g makahatag kalibog labi na kung adunay grabe nga mga krisis sa nasud.
Sa pagkakaron, pipila ka mga service providers ang mikompirma nga wala sila mogamit sa ECBS, ilabi na kung kini dili alang sa emerhensya nga katuyoan, samtang ang OCD nag-awhag kanila nga panalipdan ang integridad sa ilang mga emergency alert system ug siguroha nga kini gigamit sa husto.
