Gilusad pag-usab sa North Korea ang 5,000-toneladang barkong iggugubat niadtong Huwebes, duha ka semana human kini natikyaob atol sa unang pagsulay niini.
Ang lider sa North Korea nga si Kim Jong Un nagtawag sa insidente nga usa ka “criminal act” nga nagdala sa kaulawan sa nasud.
Ang ahensya sa balita nga gipadagan sa estado nag-ingon nga ang barko nabalik sa balanse ug karon gidunggo sa usa ka pantalan. Gilauman nga kini hingpit nga mapasig-uli sa dili pa ang usa ka miting sa nagharing partido sa ulahi ning bulana.
Samtang, taliwala sa kasuko ni Kim, labing menos upat ka mga opisyal ang gidakop, lakip si Ri Hyong-son, deputy director sa Munitions Industry Department.
Si Ri miyembro usab sa Central Military Commission sa partido, nga nagdumala sa Korean People’s Army.
Dili klaro kung unsa nga silot ang atubangon sa mga opisyal, apan ang North Korea naila sa pagpahamtang sa mapintas nga mga silot sama sa pinugos nga pagtrabaho o bisan ang silot sa kamatayon.
Ang mga hulagway sa satellite nagpakita nga ang barko gi-salvage gamit ang manual nga mga proseso, lakip na ang pagguyod gamit ang mga pisi ug mga barrage balloon.
Ang mga analista sa politika nag-ingon nga ang rehimen ni Kim seryoso sa pagpalig-on sa militar niini, labi na ang pag-moderno sa navy niini.
Pipila lang ka semana sa wala pa ang insidente, gipadayag usab sa North Korea ang susamang barkong iggugubat, nga gitawag ni Kim nga usa ka makasaysayanon nga kalampusan.
