GENSAN – Usa ka insidente sa pagpamusil ang nahitabo sa Zone 1, Purok Balunto, Barangay Labangal, General Santos City nga miresulta sa pagkamatay sa usa ka negosyante.
Giila ang biktima nga si Allan Sayas Granada Jr., 38 anyos , residente sa maong lugar nga matud pa nga padulong na unta sa pagsarado sa iyang tindahan sa dihang duol-on siya sa duha ka wala mailhing lalaki.
Gilaraw ang mga suspek nga naka-itom ug gray nga jacket ug naka-bonnet, ug kalit lang giluthang og makadaghang higayon ang biktima. Human sa pamusil, misakay dayon ang duha ka suspek sa usa ka itom nga XRM nga motorsiklo ug paspas nga mipahawa sa lugar padulong sa Makar, Barangay Labangal.
Gilayon nga girespondehan sa kapulisan ang insidente ug gidala sa ospital ang biktima, apan gideklara kini nga dead on arrival
Sa pagkakaron, wala pa mahibaloi ang motibo sa krimen ug padayon pa ang imbestigasyon sa kapulisan aron mailhan ug madakpan ang mga responsable sa maong pagpamusil.
Nanawagan ang otoridad sa publiko nga motabang pinaagi sa paghatag og impormasyon nga mahimong makatabang sa pagsulbad sa kaso.
