GENERAL SANTOS CITY – Patay ang usa ka negosyante human gipusil kagahapon sa kilid sa usa LYR building, sa J. Catolico Ave. Brgy Lagao ning dakbayan.
Sa inisyal nga imbestigasyon, natigayon ang insidente alas-5:45 sa hapon, kung asa ang biktima giilang si Mapulo Dior Kamid, 37-anyos, residente sa Agan North ning siyudad.
Gikabutyag nga naglingkod lang ang biktima dihang kalit giduulan sa nga suspek nga nagsul-ob ug face mask ug naka-itum nga jacket, dayon gipusil sa ulo. Gilayon matud pang misibat ang gunman sakay sa XRM nga motorsiklo nga maneho sa usa ka kauban.
Gilayong gidala sa Socsargen County Hospital ang biktima, apan nahunusan sa kinabuhi alas-8:00 kagabii.
Gikabutyag nga caliber 45 pistol ang gigamit sa pagpusil sa biktima. Kasamtangang nagpadayon ang imbestigasyon kalabot sa maong krimen.
