Mopasaka og kasong murder ug frustrated murder ang kampo sa National Bureau of Investigation (NBI) ug Philippine National Police (PNP) kalabot sa pagpatay kang kanhi board secretary sa Philippine Charity Sweepstakes Office (PCSO) Wesley Barayuga.
Matod sa NBI Organized and Transnational Crimes Division (OTCD), nga nag-imbestigar sa kaso, lakip sa mga kaso nga gipasaka mao ang mga personalidad nga nalambigit sa ambush niadtong tuig 2020.
Lakip sa nitubag sa reklamo mao sila si kanhi PCSO general manager Royina Garma, kanhi National Police Commission commissioner Edilberto Leonardo, police officials Jeremy Causapin, Santie Mendoza ug Nelson Mariano.
Kahinumdoman nga ang kaso na-prompt human nihatag og testimonya si Mendoza sa Quadcom bahin sa insidente niadtong Hulyo 30, 2020, diin napatay si Barayuga sa ambush duol sa buhatan sa PCSO sa Mandaluyong.
Sa iyang testimonya, gipasanginlan ni Santie Mendoza sila si Royina Garma ug Edilberto Leonardo nga maoy gitumbok nga utok sa pagpatay kang Wesley Barayuga, nga gilimod dayon nila ni Garma ug Leonardo.
