GENSAN- Opisyal nang gilusad karong adlawa, Oktubre 5, ang Nationwide Bloodletting Activity nga Dugong Bombo “A Little Pain, A Life to Gain”, nga gipangunahan sa Bombo Radyo Philippines ug Bombo Radyo Philippines Foundation Inc., sa pakigtambayayong sa Philippine Red Cross.
Ang maong bloodletting activity ipahigayon sa Nobyembre 14, 2026 . Sumala pa kang Johnny Fuscablo, Quality Assurance Officer sa Philippine Red Cross SARGEN Chapter, importante ang pagdonar og dugo tungod kay ang dugo dili mahimong himoon o mapalit sama sa mga tambal, ug nag-agad kini sa mga boluntaryong donor nga andam motabang nga walay gipaabot nga kapuli.
Dugang pa niya nga ang pagdonar og dugo usa ka porma sa ‘Corporate Social Responsibility’ tungod kay pinaagi niini, mapaambit sa donor ang iyang dugo alang sa mga nanginahanglan ug makatabang sa pagmintinar sa maayong panglawas. Samtang, ang Dugong Bombo sa Gensan ipahigayon sa Robinsons.
Ang mga successful blood donors makadawat og Dugong Bombo T-shirt, hot meals ug drinks, vitamins, certificate, ug donor’s card isip pagpasalamat sa ilang pagdonar.
Gipunting nga ang usa ka blood donation mahimong makatabang sa pagluwas og hangtod tulo ka kinabuhi, busa giawhag ang publiko nga mahimong blood donor ug moapil sa maong kalihokan aron makatabang sa pagdugang sa blood supply alang sa mga pasyenteng nanginahanglan og dugo.
