Walay kabutngan ang kalipay sa pamilyang Mejias sa Brgy. Ampayon, Butuan City human nga si Angela Mejias nakadaog og tulo ka gold medals sa Palarong Pambansa 2025, sa arnis game sa synchronized Likha Anyo Espada y Daga, Synchronized Likha Anyo Single Weapon, ug synchronized – Double Weapon categories para sa elementary girls level.
Matod sa iyang amahan nga si Rosiller Mejias, gituman ni Angela ang iyang gisaad nga bulawan nga medalya isip regalo sa adlawng natawhan kagahapon samtang adlawng natawhan ni Angela karon mao nga doble ang selebrasyon sa pamilya.
Dugang pa ni Rosiller nga halos dili na mapili ang iyang anak sa mga contest nga gisalmotan sa ilang tunghaan sa Ampayon Central Elementary School tungod sa kagamay niini, apan tungod sa iyang pagkamalahutayon sa pagbansay, maihap na lang sa usa ka kamot ang gidaghanon sa mga higayon nga wala siya makaduwa sa duha ka tuig nga pagbansaybansay.
Malipayon kaayo sila nga nakab-ot ni Angela ang iyang pangandoy nga makakuha og bulawang medalya tungod kay nakadaog ra siya og silver sa Palarong Pambansa 2024 sa Sugbo.
