Nisaka na sa 81 ang ihap sa mga namatay sa linog nga miigo sa Mindanao niadtong Hunyo 8, samtang 31 ka tawo ang nagpabiling nawala, base sa pinakabag-o nga situational report nga gipagawas sa National Disaster Risk Reduction and Management Council (NDRRMC).
Mikabat sa 1,315 ka tawo ang gitaho nga nasamdan, bisan pa, sumala sa ahensya, kadaghanan sa gitaho nga mga casualty gipaubos pa sa validation.
Gi-report usab sa ahensya nga kapin sa 380,000 ka pamilya o 1.63 milyon nga mga indibidwal ang naapektuhan sa kapin sa 600 ka mga barangay sa Regions IX, XI, XII, ug sa Bangsamoro Autonomous Region in Muslim Mindanao (BARMM).
Sa mga naapektuhan sa miaging linog, kapin sa 89,000 ka mga indibidwal ang nawad-an og pinuy-anan, diin kapin sa 23,000 ka mga tawo ang nagpabilin sa mga evacuation center samtang kapin sa 63,000 ka mga indibidwal ang temporaryo nga nagpuyo uban sa ilang mga paryente o higala.
Sa damage assessment, kapin sa 87,000 ka mga balay ang nadaot, lakip na kadtong hingpit nga naguba ug partially damaged.
Niabot na usab sa P1.356 bilyon ang kantidad sa kadaot sa sektor sa imprastraktura sa mga rehiyon nga naigo sa linog.
Tungod niini, 18 ka siyudad ug munisipyo ang padayon nga gipailalom sa state of calamity.
