GENERAL SANTOS CITY – Emosyunal ug daw sa dili gihapon makatuo ang ice cream vendor nga si Mr. Marcelino Entia Jr., 62-anyos sa hilabihan ka dako nga swerte ug grasya nga miabot sa iyang kinabuhi pinaagi ni Sen. Manny Pacquiao.
Kagabii, human magdula ug basketball, gipaadto sa fighting senator sa iyang mansyon ang nasampit nga ice cream vendor kauban ang misis ug upat niini ka anak.
Giimbitahan pa sila niini nga saluhan ang senador sa panihapon, kung asa daw sa dili makatuo ang magtiayon, bisan ang ilang mga anak, sa maong panghitabo.
Naistoryahan nila ang kalabot sa house and lot nga ihatag kanila sa senador, nga nahimutang sa subdivision nga gipahimo mismo ni Pacquiao alang sa mga tawo nga iyang gitabangan.
Gikatakda matud pang i-turnover sa pamilya ni Tatay Lino iyang bag-ong balay ug lote sa adlaw’ng Sabado, kung asa gawas nga may tubig ug kuryente na, kumpleto na usab matud pa sa mga gamit ug pipila ka appliances, ug hatagan pa sila ug tindahan isip panginabuhian.
Sa pakighinabi sa Bombo Radyo, dili matud pa masaysay ni Tatay Lino ang tumang kalipay ug pagpasalamat sa Diyos gumikan sa sobra-sobra nga tabang nga gihatag kaniya sa idolo.
Gisaysay ni Sen. Pacquiao nga natandog siya sa ice cream vendor nga si Tatay Marcelino Entia Jr., dihang nakahimamat niya kini kaniadtong Dominggo.
Sumala pa nga nakita niya ang iyang kaugalingon sa edaran, kaniadtong naglisod pa usab sila, ug sama kang Tatay Lino, namaligya usab siya ug icedrop.
Sa iyang gihatag nga house and lot, cash ug uban pang tabang sa edaran, nanghinaot matud pa ang fighting senador nga ampingan kini ug gamiton sa maayo sa nahisgutang pamilya.
Nanghinaot usab matud pa si Pacquiao nga magpadayon lamang sa pagsalig sa Diyos ug paghimo ug maayo si Tatay Lino.
Nasayran nga miabot usab si Mommy Dionisia Pacquiao kagabii, kung asa nakaistorya niini ang magtiayon nga Entia, ug gitambagan usab ang mga nasampit nga ampingan gayud ang grasya nga nadawat, nga usahay lamang maud pa muabot sa kinabuhi sa tawo.
Kahinumduman nga una nang gihatagan ni Pacquiao si Tatay Lino ug P33,000 nga cash sa una nilang panagkita kaniadtong Dominggo. Gihatagan na usab ug trabaho ang magtiayon, sa usa ka kolehiyo sa siyudad.
Samtang, dili usab matud pa makatuo si Jen Manilay, nga magtrending ang video nga iyang gi-post sa Facebook kaniadtong Dominggo, sa panaghimamat nilang nina Sen. Pacquiao ug ice cream vendor nga si Tatay Lino.
Kahibauan nga sa karon aduna nay dul-an upat ka milyon ka views, ug libuan ka shares ug komento ang nasampit nga video, kung asa daghan ang nagpadayag sa ilang kalipay ug pagdayeg sa gihimo sa fighting senator sa edaran nga ice cream vendor.
Matud kang Manilay, wala siya angdahum nga magtrending iyang video, gumikan kaniadtong tungura nalipay lamang siya sa nasaksihan nga kamaayo ug pagtabang ni Sen. Pacquiao kang Mr Entia, hinungdan nga nahuna-hunaan nga i-share sa social media.
