GENSAN – Gibutyag ni Judith Janiola, labaw sa City Population Office sa dakbayan sa Gensan nga dili magkapareha ang mga rason nganong mikunhod ang ihap sa mga nagpakasal sa Pilipinas niadtong 2024, sumala sa Philippine Statistics Authority (PSA).
Matod ni Janiola, base sa mga pagtuon ang mga magkarelasyon sa karong panahuna ang ‘aware’ na nga dako ang gastos sa pagpakasal og sila praktikal nga mas unahon ang pagtrabaho kaysa sa magpakasal.
Dugang pa niini nga ang ‘trend’ usab karon sa nasod ang ginatawag nga ‘co habitation’ kon pagpuyo nga magkauban kon mag-ipon una ayha na lang ang magpakasal bisan pa sa pag-angkon og mga anak.
Sa pamahayag ni Janiola adunay lahi lahi nga ‘preference’ ang mga magrelasyon depende sa ilang estado usab sa panginabuhian.
Sa datos sa PSA nga gipagawas niadtong Nobyembre 25, 2025, adunay katibuk-ang 371,825 nga kasal ang narehistro sa nasod niadtong 2024, nga mas ubos og 10.2 porsyento gikan sa 414,213 rehistradong kasal niadtong 2023.
