GENERAL SANTOS CITY – Dead on arrival sa ospital ang usa ka motorista human mabanggaan sa sikad.
Giila ang driver sa sikad nga si Allan Alegado Lauri, 40 anyos, sakay niini ang 7 anyos nga pasahero nga si alias Jane, pulos lumulupyo sa Prk Malok A, North Gate, Brgy. Labangal ning syudad.
Samtang giila ang motorista nga si Dodong Palang Malantas, 58 anyos nga taga Prk Cahilsot, Brgy. Calumpang.
Sumala pa sa TEU Gensan, alas 5:20 sa hapon kagahapon samtang ginasubay sa mga nahisgutan ang dalan sa Prk. Malok, Acharon Blvd, Brgy. Labangal kung diin nauna ang sikad ug anaa sa likod ang motorsiklo.
Pag abot sa nahitabuan niliko ang sikad og wala damha niini nga paspas ang pag-overtake sa motorista hinungdan sa banggaanay.
Sa kakusog sa impact, nasayad palayo ang sikad samtang ang motorista ang nalagpot sa pader.
Samad sa tiil ug pipila ka bahin sa panglawas ang naangkon sa driver sa sikad ug sa pasahero niini apan ang driver sa motorsiklo ang nakaangkon ug seryosong samad sa iyang ulo nga dali dayung gidala sa labing duol nga ospital apan gideklarang dead on arrival sa attending physician.
Sa pagkakaron, anaa sa kustodiya sa Traffic Enforcement Gensan ang motorsiklo ug sikad alang sa proper disposition.
