GENSAN- Giklaro ni Atty. Jong Gonzales, labaw sa public safety office nga ang gipatuman nga moratorium alang sa mga gagmay nga tricycle molungtad na lamang hangtod sa Disyembre ning tuiga.
Gilauman nga inig tungtong sa Enero 1, 2027, kinahanglan nga nakasubay na sa saktong gidak-on ang tanang yunit sa tricycle sa dakbayan.
Sa kasamtangan, wala pa’y igo nga petsa kon kanus-a sugdan ang opisyal nga pagpatuman sa color coding tungod kay gihulat pa ang direktiba gikan sa Mayor.
Apan, nagpahimangno si Atty. Gonzales nga posibleng dunganon na ang pag-ilis sa kolor sa mga yunit inig pa-usab sa gidak-on sa ilang mga sidecar.
Giawhag ang mga driver nga pahimuslan ang nahabiling mga bulan sa moratorium aron i-standardize ang ilang mga yunit.
Kini aron malikayan ang dinalidali nga pagtrabaho ug dugang gasto sa pintura kon ugaling mapatuman na ang bag-ong color coding scheme dungan sa bag-ong gidak-on sa sidecar sa sunod tuig.
