Daghang nakigduyog sa kasubo sa usa ka mommy dolphin sa Australia nga nakit-an nga naglangoy-langoy samtang gidala-dala ang iyang anak nga wala na’y kinabuhi.
Ang mommy dolphin nga ginganlag Fraggle nakita nga nagpadayon sa pagdala sa lawas sa iyang bag-ong anak sulod sa unom ka adlaw, bisan pa nga wala na kini buhi. Nakuha sa drone footage sa Geographe Marine Research ang makapaguol nga eksena diin balik-balik nga gisuportahan ug gidala ni Fraggle ang iyang patay nga anak samtang naglangoy uban sa ubang miyembro sa ilang grupo.
Matud sa mga marine researcher, ang maong panghitabo nagpakita sa komplikadong sosyal nga kinaiya sa mga dolphin. Bisan pa, wala pa matino sa mga siyentista kung ang maong pamatasan direktang resulta sa kasubo o usa ka natural nga kinaiya sa usa ka inahan nga dili dayon mobiya sa iyang patay nga anak.
Mas makapadugmok pa sa kasingkasing ang kahimtang sa mga anak ni Fraggle sa nangaging mga panahon, tungod kay ang pagkamatay sa iyang bag-ong anak dili mao ang unang pagkawala nga iyang nasinati isip inahan.
Ang makapaguol nga eksena nahimong viral ug nakapukaw sa simpatiya sa daghang tawo, ilabina sa paagi ni Fraggle sa padayon nga pagdala sa iyang anak bisan pa nga wala na kini’y kinabuhi.
